jo meri aankhon mein surkhi thi sham hote hi
kisi ki yaad sulagti thi sham hote hi

tamam din main tamazat mein kat deta tha
phir ek hawa mujhe chhuti thi sham hote hi

khincha hua chala jata tha main kanar-e-ab
wahan udasi bulati thi sham hote hi

gale na lagta main us ke to aur kya karta
faza mein khunki hi aisi thi sham hote hi

koi qadim udasi basi hui thi wahan
ujad basti sisakti thi sham hote hi

main apne dukh use shayad kabhi nahin kahta
magar wo baat hi karti thi sham hote hi