jo mohabbat ko ikhtiyar kare
harf-e-matlab na aashkar kare

aadmi ko buland rahna hai
pastiyon ko na ikhtiyar kare

hai wo insan qadr ke qabil
aadamiyat ko jo shiar kare

hum to mar mit chuke hain jite ji
maut ka kaun intizar kare

hum bhi rakhte hain pas-e-khuddari
kaun izhaar-e-haal-e-zar kare

chaak hai jis ka daman-e-hasti
kyon gareban ko tar-tar kare

shauq hai jis ko khak hone ka
mazhab-e-ishq ikhtiyar kare

hum hain masruf-e-did-e-mushaf-e-rukh
kaun nazzara-e-bahaar kare

nabz dubi mariz-e-ulfat ki
chaara-gar khak kya shumar kare