har aadmi hai mubtala ranj-o-azab mein
aaram se hai kaun jahan-e-kharab mein

rindon ko kab hai dozakh-o-jannat se wasta
zahid magar lage hain husul-e-sawab mein

jo log hain zamane mein sargarm-o-mustaid
rahte nahin ulajh ke khayal aur khwab mein

jis ki ziya se honi thi tazin-e-kaenat
wo husn chhup saka na kisi bhi hijab mein

duniya hai jis ka nam mukammal fareb hai
ahl-e-nazar na khoen kabhi is sarab mein

ye waqia hai hazrat-e-‘saqi’ ki zindagi
ab qaid ho ke rah gai jam-e-sharab mein