jo shakhs muddaton mere shaidaiyon mein tha
aafat ke waqt wo bhi tamashaiyon mein tha

us ka ilaj koi masiha na kar saka
jo zakhm meri ruh ki gahraiyon mein tha

wo the bahut qarib to thi garmi-e-hayat
shola hujum-e-shauq ka purwaiyon mein tha

koi bhi saz un ki tadap ko na pa saka
wo soz wo gudaz jo shahnaiyon mein tha

bazm-e-tasawwuraat mein yaadon ki raushni
aalam ajib raat ki tanhaiyon mein tha

us bazm mein chhidi jo kabhi jaan-dahi ki baat
us dam hamara zikr bhi saudaiyon mein tha

kuchh waz-e-ehtiyat se 'bano' the hum bhi dur
kuchh doston ka hath bhi ruswaiyon mein tha