jo tere dil mein hai wo baat mere dhyan mein hai
teri shikast teri luknat-e-zaban mein hai

tere visal ki khush-bu se badhti jati hai
na jaane kaun si diwar darmiyan mein hai

hamein tabah kiya aab o gil ki sazish ne
ki ek dost hamara bhi aasman mein hai

magar ye log bhala kis liye udas hue
ye kya tilism bahaaron ki dastan mein hai

hum ahl-e-dard ko tohmat hui hai aazadi
ki sari umr giraftar ek aan mein hai