jude hue hain pari-khane mere kaghaz se
jo uth rahe hain ye afsane mere kaghaz se

katarta rahta hai miqraaz-e-chashm se mujh ko
banana kya hai use jaane mere kaghaz se

qalam ne nok-e-alam kya rakhi ba-chashm-e-dil
chhalakne lag gae paimane mere kaghaz se

raqam karun bhi to kaise main dastan-e-wafa
huruf phirte hain begane mere kaghaz se

abhi rakhi bhi nahin lau charagh par main ne
lipat gae kai parwane mere kaghaz se

kudal-e-khama se bota hun main junun 'sarim'
so ugte rahte hain diwane mere kaghaz se