jurat-o-azm chahiye dil mein
koi mushkil nahin hai mushkil mein

us safine ka tazkira be-sud
ho chuka hai jo gharq sahil mein

hae us karwan ki pamali
lut gaya jo pahunch ke manzil mein

ye hai shan-e-kamal-e-khuddari
be-niyazi hai un ki mahfil mein

roghan-e-khun-e-arzu se mere
jal raha hai charagh mahfil mein

phunk sakta hai khirman-e-hasti
wo sharara hai tuda-e-gul mein

raushni wo hai aur ye zulmat
farq itna hai haqq-o-baatil mein

munh ki khani padegi ai 'hamdam'
jo bhi aaya tere muqabil mein