jurm ulfat ki mujhe khub saza deta hai
khat ko padhta bhi nahin aur jala deta hai

tut jate hain sabhi aaina-khane mere
jab takhayyul teri taswir bana deta hai

mere hakim ko bahut bar-e-garan guzrega
koi zalim hai jo zanjir hila deta hai

us ke aane ki mujhe jhuti tasalli mat do
ye dilasa to mera dard badha deta hai

mere ahbab ko kuchh sochna hoga 'daem'
mera dushman mujhe jine ki dua deta hai