kaam kuchh to mera lahu aaya
bagh mein mausam-e-numu aaya

hijr mein tere mujh pe kya guzri
aaj tak puchhne na tu aaya

jis tarah main ne tujh ko yaad kiya
yaad yun kab kisi ko tu aaya

tera kucha hai ya koi maqtal
jo bhi aaya lahu lahu aaya

main usi ki tarah mila us se
aaina ban ke ru-ba-ru aaya

khatm daur-e-khayal-o-khwab hua
lamha-e-tark-e-arzu aaya

raste der tak rahe raushan
dur tak mere sath tu aaya

yaad aai kisi ki phir 'khawar'
dil se aankhon mein phir lahu aaya