kab baat ho baghair khushamad wahan durust
wo na-durust bhi jo kahen kahiye han durust

thode se din bahaar ke hain kis umid par
karte hain apne murgh-e-chaman aashiyan durust

kuchh main bhi apna haal-e-tabiat bayan karun
gar ho mizaj aap ka ai mehrban durust

us ko durusti-e-dil-e-ashiq se kya gharaz
jis bad-zaban ki nahin ab tak zaban durust

aankhon mein rah ki dil mein thahar tere waste
aarasta har ek makan har makan durust

har roz taziyana-e-zulf-e-daraaz se
tu ne bhi dil ko khub kiya meri jaan durust

aata hai samne jo wo ghaarat-gar-e-shakeb
ausan 'dagh' rahte hain apne kahan durust