kab ka guzar chuka hai wo mausam shabab ka
ab zikr hai fuzul wafa ki kitab ka

fursat mile to dekh zara dil ka aaina
is mein hai aks tere gunah-o-sawab ka

chup-chap haal-e-ahl-e-nazar dekhte raho
hai kis ke pas waqt sawal-o-jawab ka

har shakhs ghir gaya hai nae iztirab mein
toda hai jis ne qufl dar-e-iztirab ka

rakhta hai tere ru-e-hasin se mushabahat
har shakh par saja hai jo chehra gulab ka

kafi hai us ki zat ke irfan ke liye
mauj-e-hawa ke dosh pe udna sahab ka

'shahid' jinhen khabar hai rumuz-hayat ki
rakhte nahin hisab gham-e-be-hisab ka