kab utrega ruh se gara mitti ka
mitti ki hai jhil kinara mitti ka

main ne har dam ki dildari mitti ki
main ne har dam qarz utara mitti ka

main ne chaudah chand kiye hain jis ke nam
us ne bheja ek sitara mitti ka

mitti ko raunda mitti ka khun kiya
hoga aakhir-kar ijara mitti ka

aankhon mein hai sahraon sa suna-pan
panw ke niche hai angara mitti ka

main ne panw jama rakkhe 'ausaf' yahan
main ne samjha saf ishaara mitti ka