kabe mein jaan-ba-lab the hum duri-e-butan se
aae hain phir ke yaro ab ke khuda ke han se

taswir ke se tair khamosh rahte hain hum
ji kuchh uchat gaya hai ab nala o fughan se

jab kaundti hai bijli tab jaanib-e-gulistan
rakhti hai chhed mere khashak-e-ashiyan se

kya khubi us ke munh ki ai ghuncha naql kariye
tu to na bol zalim bu aati hai wahan se

aankhon hi mein rahe ho dil se nahin gae ho
hairan hun ye shokhi aai tumhein kahan se

sabzan-e-bagh sare dekhe hue hain apne
dilchasp kahe ko hain us bewafa jawan se

ki shust-o-shobadan ki jis din bahut si un ne
dhoe the hath main ne us din hi apni jaan se

khamoshi hi mein hum ne dekhi hai maslahat ab
har yak se haal dil ka muddat kaha zaban se

itni bhi bad-mizaji har lahza 'mir' tum ko
uljhaw hai zamin se jhagda hai aasman se