kabhi gardish-e-falak se na main be-qarar hota
gham-e-ishq agar jahan mein mera gham-gusar hota

tujhe sang-dil samajhta tujhe zulm-pesha kahta
tere rahm ke jo qabil mera haal-e-zar hota

main qadam har ek ke leta na kisi se bair rakhta
jo azal se main ghubar-e-sar-e-rahguzar hota

teri aarzu se badh kar koi aarzu nahin hai
yahi aarzu jo hoti to main kaamgar hota

mere aansuon ke qatre dur-e-shahwar bante
kabhi gham mein dusron ke jo main ashk-bar hota

jo qafas mein hote paida to sukun dil ko milta
na shuur-e-lala-o-gul na gham-e-bahaar hota