kabhi kuza kabhi kasa kabhi saghar banate hain
ye kaisi pyas ki taskin kuza-gar banate hain

banate hain safine jo samundar par karne ko
wahi patwar ke hamrah kyon langar banate hain

chalo mana ke mehnat se makan tum hi banate ho
mohabbat se magar apni hamin to ghar banate hain

jo pahle hathkadi aur bediyan thin bint-e-hawwa ki
ab un ki shakl ke ahl-e-jahan zewar banate hain

phir us ka waqt-e-rukhsat laut kar aana palat jaana
hum apni aankh mein har raat wo manzar banate hain

tabiat khud-bakhud mail kiya karti hai jazbon ko
kabhi kya soch kar hum dost ya dilbar banate hain

wo bhula phir kisi bhi sham ghar wapas nahin lauta
'hina' man bap jis ka aaj bhi bistar banate hain