kabhi padho to mujhe harf-e-mo'tabar ki tarah
ye kya ki padhte ho farsuda si khabar ki tarah

qalam to karte ho sar ko mere magar sun lo
main reg-zar-e-wafa mein hun ek shajar ki tarah

udasi khol ke baal apna so rahi hai yahan
ki jaise shahar mein har ghar hai mere ghar ki tarah

hamare zauq-e-parastish ko tum duaen do
chamak rahe hain ye patthar jo ab guhar ki tarah

masham-e-jaan mein abhi tak hai us badan ki bas
khila tha raat jo ek ghuncha-e-sahar ki tarah

har ek sang pata puchhta hai ghar ka mere
nahin hai kya koi sar aur mere sar ki tarah

nawah-e-jaan mein ujalon ka raqs hai 'shibli'
ye kaun aaya dabe panw yun sahar ki tarah