rag-e-jaan mein utar kar bolta hai
haqiqat jab sukhnawar bolta hai

kisi se kab wo dar kar bolta hai
zaban-e-haq qalandar bolta hai

ata hoti hai jis ko chashm-e-bina
to qatre mein samundar bolta hai

nahin hira chamakta be-tarashe
tarash jae to patthar bolta hai

wo jhuta hai jo be-tahqiq baaten
kisi se sun ke aksar bolta hai

wahi hai mo'atabar aansu jo 'akhtar'
sar-e-mizhgan thahar kar bolta hai