kabhi qalaq mein kabhi fikr-o-intizar mein hain
hazar tarah ke sadme firaq-e-yar mein hain

wo sun ke qissa-e-gham hanste hanste lot gaya
ye shokhiyan bhi nai shokh-e-gul-ezar mein hain

main kya bayan karun aage tere ai 'zahid'
ajib kaifiyaten nashsha ke khumar mein hain

jahan mein hum ne uthae the ranj kya kya kuchh
fana ke baad bade chain se mazar mein hain

wo hum ko qatl karen chahen tukde tukde karen
hum un ke bas mein hain hum un ke ikhtiyar mein hain

khuda kare ki na aaen wo fatiha padhne
ki tin din abhi bhaari mujhe mazar mein hain

nasihat aap to karte hain hazrat-e-naseh
main jaanta hi nahin aap kis shumar mein hain

payambar ye bhi kahna hamari jaanib se
tumhaari yaad mein hain aur intizar mein hain

khuda ke fazl se katti hai lutf se ai 'ranj'
bade maze mein hain hum bhi badi bahaar mein hain