kabhi zamin kabhi aasman se guzri hai meri hayat bade imtihan se guzri hai khushi ki dhup mayassar na ho saki mujh ko ghamon ki aandhi meri dastan se guzri hai bataun kya main tumhein zindagi ke bare mein meri har ek shab ashk-e-rawan se guzri hai kisi ke hijr mein barbaad dastan-e-hayat ghazal ki shakl mein sare jahan se guzri hai tumhaare hijr mein aankhen rahi hain nam har pal meri zaban bhi aah-o-fughan se guzri hai dhadakne lag gaya tezi se dil kabhi jab bhi tumhaari yaad dil-e-ashiyan se guzri hai har ek samt se aati hai pyar ki khushbu zaban 'mir' ki shayad yahan se guzri hai har ek phul ko murjha gai ‘ali-afzal' na jaane kaisi hawa gulistan se guzri hai nabi ke din ki azmat ke waste 'afzal' tamam nasl-e-ali imtihan se guzri hai