kadi mehnat hai ya ye tyag hai ya ye tapasya hai
main aksar sochti rahti hun meri zindagi kya hai

anubhaw zindagi ki sab se achchhi pathshaala hai
magar kambakht us ki fees itni hai ki tauba hai

wo mujh se kah raha hai ishq hai ek aag ka dariya
to phir is aag mein tu kud ja na dekhta kya hai

tumhaare pas to sab kuchh hai bas ek main nahin to kya
meri aankhon ki angnai mein ek yaadon ka mela hai

kisi ka koi ho jae nahin ab farq padta hai
ye dil to kal bhi tanha tha ye dil to ab bhi tanha hai

nadi talab jharne aur kuen hain jis ke qabze mein
magar hairat ye hai wo shakhs ab bhi kitna pyasa hai

meri shohrat mera samman sab us ki nawazish hai
magar main sochti hun 'anjana' is mein mera kya hai