kadi nigah rakhega wo sim-tan mujh par
ki mehrban hai kisi phul ka badan mujh par

main ek khoi hui aag ki talash mein tha
shaguft hone lage hain magar chaman mujh par

phir ek bar wahi dhup odh kar niklun
karega chhanw agar aaj bhi gagan mujh par

firaq-o-wasl haqiqat mein ek hon ki na hon
kisi ke ishq mein lazim hai husn-e-zan mujh par

alag alag hi rahenge dam-e-visal bhi hum
main apne man pe fida hun na mera man mujh par

kisi tilism se raushan hai mera dil 'sajid'
dayar-e-ghaib se utrega koi fan mujh par