kahan furqat mein hai dildar uthna baithna chalna
tere aashiq ko hai dushwar uthna baithna chalna

tumhaara wahshi-e-laghar na thahra shahr mein dam bhar
pasand aaya sar-e-kohsar uthna baithna chalna

faqirana kisi ke zer-e-sae hum bhi rahte hain
hamesha hai pas-e-diwar uthna baithna chalna

kahen kya dosto is ishq ne aajiz kiya hum ko
giran hota hai ab har bar uthna baithna chalna

'shabab' is be-khudi mein mashghala hai bas yahi baqi
miyan-e-kucha-e-dildar uthna baithna chalna