kahan hum rahe phir kahan dil rahega
isi tarah gar tu muqabil rahega

khuli jab girah band-e-hasti ki tujh se
to uqda koi phir na mushkil rahega

dil-e-khalq mein tukhm ehsan ke bo le
yahi kisht-e-duniya ka hasil rahega

hijab-e-khudi uth gaya jab ki dil se
to parda koi phir na hael rahega

na pahunchega maqsad ko kam-himmati se
jo salik talabgar-e-manzil rahega

na hoga tu aagah irfan-e-haq se
gar apni haqiqat se ghafil rahega

khafa mat ho 'bedar' andesha kya hai
mila gar na wo aaj kal mil rahega