kahan zamin ke zaif zine pe chal rahi hai ye raat sadiyon se mere sine pe chal rahi hai rawan hai mauj-e-junun pe ehsas ka safina aur ek tahzib is safine pe chal rahi hai khumar-e-khwab-e-sahar ye dil aur teri yaaden hawa dabe panw aabgine pe chal rahi hai main mar gaya to khabar nahin un ka kya banega dukan-e-yaran to sirf kine pe chal rahi hai guzar chuka hai teri judai ka saneha bhi hamari dhadkan nae qarine pe chal rahi hai