kahin kinae pe rakhti hai aarzu mujh ko
baha ke dur na le jae justuju mujh ko

mujhe sanbhaal mere sath chal mere saqi
ki le chala hai kahin aur ye subu mujh ko

wo ped hun jise pani nahin mila kab se
meri zamin ne hi rakkha hai be-numu mujh ko

tere baghair main kaise yahan chala aaya
bahut udas karegi ye ha-o-hu mujh ko

tujhe bataun mohabbat mein aisa hota hai
teri khamoshi bhi lagti hai guftugu mujh ko