kahin zamin kahin aasman chhod aae
dayar-karb mein apna makan chhod aae

nae safar pe nae mausamon ne di aawaz
kadi thi dhup magar saeban chhod aae

ye jaan kar bhi ki na-meharbaniyan hongi
purane shahar mein sab mehrban chhod aae

talatum-e-gham-e-dauran mein bah gae patwar
hawa ke hath mein hum baadban chhod aae

jahan se izn-e-takallum kabhi nahin milta
wahin pe apni darida zaban chhod aae

hamein pata tha ki mojiz-bayaniyan hongi
zaban-e-khalq magar bad-guman chhod aae

jahan kisi ko bhi apna pata nahin milta
wajud-e-'nur' wahin be-nishan chhod aae