kahte hain ki de meri bala dad kisi ki
kanon ko maza deti hai fariyaad kisi ki

rona hai tera kaam magar dida-e-tar dekh
taswir-e-khyali na ho barbaad kisi ki

karta hun gila un se jo virani-e-dil ka
kahte hain ye basti nahin aabaad kisi ki

aabaad khuda rakkhe tujhe ku-e-mohabbat
mitti nahin hoti yahan barbaad kisi ki

kuchh aur to hum pas 'mubarak' nahin rakhte
rakhta hai tamanna dil-e-nashad kisi ki