kaise kaise dil-nashin khwabon ke manzar le gaya
meri aankhon se koi ninden chura kar le gaya

aaj wo yaadon ki dastawez jhuti ho gai
koi is basti ke naqshe se mera ghar le gaya

chandni raaton se wabasta thin bazm-araiyan
chand kya duba ki yaadon ka muqaddar le gaya

muddaton se hain udanen ek hi manzar mein qaid
noch kar jab se wo meri soch ke par le gaya

aainon se dur wasf-e-aina-dari ko 'shan'
log kahte hain ki koi aaina-gar le gaya