kaisi aashufta-sari hai ab ke
kuchh ajab be-khabari hai ab ke

dekh kar ahl-e-gulistan ka chalan
jaan hathon mein dhari hai ab ke

shahr ka amn-o-sukun hai anqa
kaisi ye fitnagari hai ab ke

mausam-e-fasl-e-khizan hai phir bhi
shakh-e-dil apni hari hai ab ke

kor chashmon ko khuda hi samjhe
dawa-e-dida-wari hai ab ke

dar yahi hai ki kahin tut na jae
shakh phulon se bhari hai ab ke

pichhle salon se ziyaada ai 'shauq'
ranj-e-be-baal-o-pari hai ab ke