kaisi mahfil mein ai dil tujh ko laya hun dekh zara
main ne tere aish karae ab tu mere aish kara

lagta hai ye naseh bhi hai jin ki tarah ki koi chiz
yak dam aa dhamkega kahin se junhi main ne jam bhara

gadi ki raftar bhi tez hai rasta bhi hai na-hamwar
dhire dhire shant hua hun pahle to main bahut dara

apni mahaarat par tujh ko beja to na hoga itna man
main bhi man hi lunga tujh ko lekin khel ke mujhe hara

apne haal-e-zabun ka main taqdir pe dharta tha ilzam
ab malum hua 'basir' ye sab hai tera kiya-dhara