kam-sini aur shabab ka aalam
hai budhape mein khwab ka aalam

paekhana mein dekh leta hun
roz us be-hijab ka aalam

mast aankhen thin chaal matwali
be-piye aur sharab ka aalam

wasl ki shab rahegi barson yaad
aur us be-hijab ka aalam

ek bose pe sainkadon jute
ye jawab-ul-jawab ka aalam

wasl ki shab mein kya karun tadbir
hai ajab pech-o-tab ka aalam

us taraf to hai kam-sini us ki
is taraf hai shabab ka aalam

apne ashkon mein bah raha hun main
uf ye chashm-e-pur-ab ka aalam

aisi piri se lakh behtar tha
tuta phuta shabab ka aalam

na gino bosa wasl ki shab mein
aaj hai be-hisab ka aalam

hai dua 'bum' ki hazaron sal
rahe tum par shabab ka aalam