kamal-e-ishq mein jazb-o-asar ki baat na kar
unhin ki rah mein kho ja khabar ki baat na kar

teri talash mein manzil ki koi qaid nahin
haram ki dair ki diwar-o-dar ki baat na kar

kalim dekh chuke husn-e-yar ke jalwe
ye un ka bakht hai zauq-e-nazar ki baat na kar

mahak mahak uthin galiyan jo khul gae gesu
riyaz-e-hazrat-e-khairul-bashar ki baat na kar

shuur usi ka to arsh-e-barin ki zinat hai
faqat rasai-e-pa-e-bashar ki baat na kar

tulua-e-mah-e-arab se hain do-jahan raushan
ziya-furozi-e-shams-o-qamar ki baat na kar

chaman-badosh hai har zarra arz-e-taiba ka
bahaar-e-gulshan-e-gulha-e-tar ki baat na kar

bahaar-e-mushaf-e-natiq ke dekhne wale
iram ki dahr ki barg-o-shajar ki baat na kar

hamare ashk-e-nadamat ka koi mol kahan
ye nazr-e-naqd hai lal-o-gohar ki baat na kar

jahan mein chaar su phaila hua hai bughz-o-inad
andheri raat mein nur-e-sahar ki baat na kar

'shafia' ummid hai bakhshaenge wahi mujh ko
ba-juz ata-e-shah-e-bahr-o-bar ki baat na kar