kante hain kahin aag kahin sang kahin hai
ye rah-e-mohabbat hai kuchh aasan nahin hai

tu pas agar hai to har ek chiz hasin hai
sahra bhi nigahon mein meri khuld-e-barin hai

ta-umr nibhane ki qasam khai thi tu ne
wo ahd-e-mohabbat bhi tujhe yaad nahin hai

ho jae fana zat-e-khuda mein jo koi zat
kya dhundte ho us ko makan hai na makin hai

ai husn-e-haqiqat tu kabhi jalwa dikha de
sajdon ki amanat liye betab jabin hai

wo chahe to qadmon mein zamane ke jhukawe
kahne ko tere dar ka gada khak-nashin hai

ehsas-e-gham-e-duri hua hi nahin mujh ko
mahsus hua jab se ki tu dil ke qarin hai

bikhra hua maikhane ka shiraaza hai kab se
saqi hai kahin mai hai kahin jam kahin hai

hain jalwe nigahon mein meri kaun-o-makan ke
chhup jae koi mujh se ye mumkin hi nahin hai

kya nazr karun gardish-e-dauran ko 'zamir' aaj
jine ki tamanna bhi mere pas nahin hai