kar ke mashur mujhe chashm-e-karam se pahle
kar diya mohr-ba-lab us ne sitam se pahle

ek hamin ko nahin nakaami-e-qismat ka gila
na-murad aur bhi kuchh guzre hain hum se pahle

main khatawar hun lekin meri taqsir muaf
aah kab munh se nikalni hai sitam se pahle

tu ne gham de ke mujhe daulat-e-duniya de di
zindagi aisi kahan thi tere gham se pahle

pesh hai marhala-e-sakht khuda khair kare
but-kada rah mein padta hai haram se pahle

koi samjha na haqiqat ke rumuz-o-asrar
koi pahuncha na teri bazm mein hum se pahle

qafile bhatke hue manzil-e-maqsud se the
band thi rah mere naqsh-e-qadam se pahle

khel samjha tha magar tark-e-mohabbat ai 'saif'
ghaur anjam pe karna tha qasam se pahle