karbala ka rasta raushan hua
phir lahu ka marka raushan hua

kaun tha aakhir wo jis ki zat se
zindagi ka zawiya raushan hua

jazba-e-isar-o-qurbani ke nam
khak-o-khun ka silsila raushan hua

bare tujh pe ai furaat-e-be-karan
tishnagi ka martaba raushan hua

munhadim hone lagi diwar-e-jaan
jism ka zulmat-kada raushan hua

qadghanen jitni lagain waqt ne
dil-zadon ka hausla raushan hua

'naz' ka aahang-e-taza dekhna
fikr-o-fan ka daera raushan hua