usi ka zikr kahani se iqtibas rahe
wo har ghadi jo mere waste udas rahe

ye us ka qurb mujhe ishq ki ata se mila
wo dur jae magar mere aas-pas rahe

tarah tarah se mujhe tu bichhad bichhad ke mila
tarah tarah ke mere zehn mein qayas rahe

tumhaare gham ke siwa aur koi gham bhi na tha
tumhaare dard mere dard ki asas rahe

wo kitne naz se kahne lage 'rabab' agar
udas rahne lagi hai to phir udas rahe