karun jo tanqid zulmaton par
to aaega harf hikmaton par

futur-e-millat junun-e-mazhab
ye raqs karte hain wahshaton par

shuur-e-insan pal raha hai
khuda ki basti mein nafraton par

ye sazishon ke muhib sae
hain chhae sadiyon se ulfaton par

ye raqs kaisa hai jaan-o-tan mein
hun mahw-e-hairat mohabbaton par

mahak uthi hain fazaen sari
hai kaisi barsat parbaton par

'shafaq' bahaya na ek bhi aansu
dilon pe tuti qayamaton par