kash mil jae mere dil ko mohabbat teri
mujh ko har shai se ziyaada hai zarurat teri

itni ujlat mein na kar umr ke wade mujh se
do ghadi baith ki main dekh lun surat teri

chahe jitna bhi tu chhup jae meri nazron se
main ne har ek mein dekhi hai shabahat teri

ai mohabbat na mila mujh ko sila tujh se koi
farz kar li hai magar khud pe ibaadat teri

chahe jo mang le mujh se hai sabhi kuchh tera
ye meri jaan ye mera dil hai amanat teri