jo bhi kahna tha wo an-kaha rah gaya
dil ka arman dil mein daba rah gaya

umr bhar us ki jaanib main chalti rahi
phir bhi milon ka ye fasla rah gaya

yun to duniya mein sab kuchh hai mujh ko mila
sirf tu hi to mujh se juda rah gaya

apni kahta raha meri ek na suni
wo khafa tha khafa ka khafa rah gaya

aa gaya laut kar wo mere pas hi
mujh mein phir bhi kahin ek khala rah gaya

kya bataun tumhein apni taqdir se
kya mila hai mujhe aur kya rah gaya

dhundte dhundte main kahin kho gai
wo bhi mere liye lapata rah gaya

manzilen mil gain jaane kis ko 'hina'
apni qismat mein bas rasta rah gaya