kaun deta raha sahra mein sada meri tarah
aaj tanha hun magar koi to tha meri tarah

main teri rah mein pamal hua jata hun
mit na jae tera naqsh-e-kaf-e-pa meri tarah

main hi tanha hun faqat teri bhari duniya mein
aur bhi log hain kya mere khuda meri tarah

rang-e-arbab-e-raza-e-pesha mubarak ho tujhe
koi hota hi nahin tujh se khafa meri tarah

kis ko hasil ho teri chashm-e-siyah ke aage
mansab-e-silsila-e-jurm-o-khata meri tarah

aashna kaun hai naqsh-e-qadam-e-nikhat ka
yaad kis ko hai tere ghar ka pata meri tarah

'shaz' tara nahin tuta koi dil tuta hai
rah takta tha shab-e-gham koi kya meri tarah