kaun hai duniya mein mera jaan-e-jaan tere baghair
hun falak ke saeban mein be-aman tere baghair

tu hi manzil-ashna tha ek tere jaane ke baad
raston mein rah gaya har karwan tere baghair

dastan ke darmiyan phir zikr tera aa gaya
kis tarah hoti mukammal dastan tere baghair

lab pe tale pad gae alfaz gunge ho gae
harf har ek ho gaya hai be-zaban tere baghair

ho gaya 'faruq' budha hijr ke sadmat se
kis tarah rahta jawan wo naujawan tere baghair