kaun kahan tak ja sakta hai
ye to waqt bata sakta hai

ishq mein wahshat ka ek shoala
ghar ko aag laga sakta hai

jazbon ki shiddat ka suraj
zanjiren pighla sakta hai

teri aamad ka ek jhonka
ujda shahr basa sakta hai

aaine mein jurat ho to
aks bhi surat pa sakta hai

aankhon mein thahra ek manzar
rah mein gard uda sakta hai

tujh ko paiham sochne wala
khwab ko hath laga sakta hai