kaun kahta hai tum ada na karo
par wafa ki jagah jafa na karo

sarw kat jaenge pisegi hina
is tarah bagh mein phira na karo

hans rahe hain abhi khushi mein wo
mere rone ka tazkira na karo

zakhm-e-dil par na ho namak-pashi
is maze se to aashna na karo

hai qayamat tumhaari atkheli
hashr ai jaan-e-man bapa na karo

khirman-e-dil pe barq girti hai
mere rone pe tum hinsa na karo

neamat-e-ishq hai ye dagh-e-jigar
shukr-e-haq ke siwa gila na karo

hai shab-e-wasl be-takalluf ho
shokhiyan kahti hain haya na karo

hun giraftar-e-ulfat-e-gesu
mujh ko bahr-e-khuda riha na karo

shauq kahta hai khud chale jao
minnat-e-nama-bar kiya na karo

dil lagana bura hai ai 'ajiz'
chup raho us ka tazkira na karo