kaun kis baat par khafa ho jae
kuchh na bolun agar pata ho jae

mujh ko raste mein chhodne wale
tu kisi aur se juda ho jae

apne dil ka bayan le lije
is se pahle ki faisla ho jae

lagne lagta hun khud ko main achchha
samne wala jab bura ho jae

kaun sajde mein sar jhukaega
shahr ka shahr jab khuda ho jae

mujh ko jannat ki samt le jao
is se pahle ki kuchh khata ho jae

main bhi ek hijr kat aaya hun
tujh ko bhi ishq dusra ho jae