kaun sa dil hai jo shikar nahin
ai sitamgar tera shumar nahin

shauq ko ab bhi eatibar nahin
daman-e-shauq tar tar nahin

husn jab husn hai ki war kare
war khali rahe to war nahin

tujh se kya ikhtiyar ki ummid
dil ka jab dil pe ikhtiyar nahin

tujh se mayus kya ho koi saba
dil ke mausam pe ikhtiyar nahin

jhilmilane lagi umid ki lau
intizar aur intizar nahin

kar de maddham ummid ki shamen
be-qararon ko ab qarar nahin

us ne mashq-e-sitam se ki tauba
ab ye rishta bhi ustuwar nahin

zakhm-e-gul se udas hai mausam
in bahaaron pe ab bahaar nahin

yaad un ki 'fahim' kam aai
aaj kuchh dil bhi sogwar nahin