jab bhi hanste hue inkar kiya hai us ne
dil pe ek aur naya war kiya hai us ne

us ko nafrat ki nigahon se na dekhe koi
umr bhar khud ko bahut pyar kiya hai us ne

chumna us ko saliqe se zara baad-e-saba
waraq-e-gul ko bhi talwar kiya hai us ne

dhup aawaz de to chhanw pukare us ko
kitne aalam ko giraftar kiya hai us ne

kya kabhi sham-e-farozan se kisi ne puchha
kaise ek subh ka didar kiya hai us ne