kaun sa shoala lapakta hai ye mahmil ke qarib
husn kis ka hai jo bikhra hai mere dil ke qarib

na-khuda tere hawale hai safina dil ka
dub jae na kahin aa ke ye sahil ke qarib

peshwai ko chali jati hai khud hi manzil
hai thaka-manda musafir koi manzil ke qarib

koi guzra hai dabe-panw ye shahr-e-dil se
kis ki aahat si ye mahsus hui dil ke qarib

main ne dekha unhen us rahguzar mein chalte
main nai paya unhen khalwat-kada-e-dil ke qarib

dagmagae jo qadam rah-e-mohabbat mein kabhi
hum ye samjhe ki 'shamim' aa gae manzil ke qarib