khabar nahin ki safar hai ki hai qayam abhi
tilism-e-shahr mein khoe hain khas-o-am abhi

sada bhi dega kabhi to sukut ka sahra
kisi ko hone to do khud se ham-kalam abhi

jo dekhiye to zamana hai tez-rau kitna
tulu-e-subh abhi hai to waqt-e-sham abhi

wo qaht-e-ab hai dariya bhi sare khushk hue
rawan jo abr hai karta nahin qayam abhi

ab ittifaq se bach kar nikal gae to kya
rah-e-talab mein to 'nadir' hain kitne dam abhi