khak udti hai raat-bhar mujh mein
kaun phirta hai dar-ba-dar mujh mein

mujh ko khud mein jagah nahin milti
tu hai maujud is qadar mujh mein

mausam-e-girya ek guzarish hai
gham ke pakne talak thahr mujh mein

be-ghari ab mera muqaddar hai
ishq ne kar liya hai ghar mujh mein

aap ka dhyan khun ke manind
daudta hai idhar-udhar mujh mein

hausla ho to baat ban jae
hausla hi nahin magar mujh mein