khak un galiyon ki palkon se bahut chhani thi
phir bhi surat meri is shahar mein an-jaani thi

hum bhi kuchh apni wafaon pe hue the nadim
un ko bhi tark-e-talluq pe pashemani thi

khud-farebi to alag baat hai warna hum ne
apni surat kahan aaine mein pahchani thi

zindagi sang bani thi tujhe rukhsat kar ke
dil na dhadka tha to marne mein bhi aasani thi

hadisa sakht tha jaankah tha ab ke yaro
warna hum ne to kabhi haar nahin mani thi

rah gai rah mein yun sharm-e-shikasta-pai
kya thaharte kahin wo be-sar-o-samani thi

na-rasai koi kis aankh se dekhe apni
hum bhi tute hue par, raat bhi tufani thi

gul hui shama to daman bhadak uttha 'hashami'
jab nazar bujh gai virani hi virani thi